Këshilli Bashkiak i Vlorës ka zgjedhur sot Elis Halilin si kryetar të komanduar të bashkisë, një vendim që vjen pas dorëheqjes së Ermal Dredhës. Zgjedhja e tij u shoqërua me tensione dhe akuza nga opozita, e cila e denoncoi procesin si një “farsë” të paracaktuar nga kryeministri Edi Rama.
Elis Halili, një inxhinier me profesion, u emërua nënkryetar i bashkisë nga Ermal Dredha vetëm pak orë përpara se ky i fundit të jepte dorëheqjen. Ky emërim i shpejtë duket se nuk ishte pa qëllim, pasi i dha mundësi Halilit të merrte postin e kryebashkiakut të komanduar menjëherë pas largimit të Dredhës.
Halili ka një lidhje të fortë me biznesin e ndërtimit, pasi ka qenë përgjegjës në firmën “Fusha” sh.p.k., në pronësi të biznesmenit Shkëlqim Fusha. Kjo kompani ka qenë përgjegjëse për disa projekte të kontestuara në Vlorë, të cilat janë shoqëruar me dyshime për korrupsion. Kohët e fundit, Shkëlqim Fusha është marrë zyrtarisht i pandehur nga Prokuroria e Posaçme (SPAK) në lidhje me dosjen e kryebashkiakut të Tiranës, Erion Veliaj, për akuzën e “Korrupsionit aktiv të funksionarëve të lartë shtetërorë ose të zgjedhurve vendorë.”
Mbledhja e Këshillit Bashkiak u shoqërua me tensione të forta. Sipas opozitës, përfaqësuesit e Partisë Socialiste, të udhëhequr nga Blendi Çuçi, kishin marrë udhëzime të qarta për të votuar për Elis Halilin, duke e lënë procesin e votimit thjesht një formalitet. Përfaqësuesit e opozitës kundërshtuan kërkesën për votim të hapur, pasi rregullorja e këshillit parashikon votim të fshehtë.
Këshilltarët e opozitës deklaruan se emrat e kandidatëve të tjerë, të cilët ishin pjesë e procesit, nuk u përmendën fare, ndërsa gjithë fokusin e tyre e kishin te emri i caktuar nga Rama. Akuzat u shoqëruan me prova të pretenduara, siç janë letrat e prezantimit të Halilit që ishin përgatitur paraprakisht nga sekretari i këshillit, duke konfirmuar, sipas tyre, se gjithçka ishte paracaktuar.
Discussion about this post