Nga Lutfi Dervishi
Problemet nuk na kanë mposhtur kurrë. I kemi mbijetuar si pushtimeve ashtu edhe qeverive tona. Gjithmonë i kemi zgjidhur telashet me shpejtësi, efikasitet dhe një dozë të mirë kreativiteti.
Shembulli më i fundit? TikTok-u.
Nuk na pëlqen? E mbyllim!
Njerëzit mund të përdornin VPN?
Mbyllim internetin! Heqim energjinë elektrike!
Dhe kështu i japim fund telasheve. Nëse dikush thotë se librat mund të lexohen në dritën e qiriut dhe dihen telashet që sjellin librat… atëherë zgjidhja është kthimi te errësira totale!
Është e qartë se qytetërimi ka qenë gjeneratori kryesor i gjithë halleve tona. Dhe problemi bëhet më kompleks duke patur parasysh se kemi një gen shumë rezistent ndaj civilizimit.
Prandaj, si një komb me vizion të qartë dhe me dashuri të pashtershme për reforma, është mirë të kthehemi te epoka e gurit.
Epokë e cila nuk mbaroi se mbaruan gurët, por sepse dikush shpiku një gjë të mallkuar që e quajtën zhvillim.
Por për zgjidhje origjinale ne kemi metodën e pavdekshme të Doktor Adhamudhit!
Të dhemb një sy?
Krreje të shpëtojë tjetri.
S’ke para për bukë?
Hiq bukën nga lista ushqimeve
Na mbyti korrupsioni?
Heqim fare fjalën “korrupsion” nga ligji dhe ja ku e zgjidhëm!
Prandaj, e ardhmja jonë është e ndritur… për aq kohë sa s’kemi hequr edhe diellin, për t’i dhënë fund njëherë e mirë problemit të vapës së madhe!
Discussion about this post