Godina historike e Shtëpisë së Fëmijëve “Zyber Hallulli”, që për dekada ka qenë strehë për breza jetimësh në Tiranë, pritet të shembet për t’i lënë vend një kulle 17-katëshe.
Projekti, i shtyrë përpara nga Korporata e Investimeve Shqiptare (KISH), parashikon që 36 fëmijët që jetojnë aktualisht aty të zhvendosen në një godinë të re në zonën e ish-vilave gjermane, rreth 800 metra larg.
Sipas dokumenteve, trualli prej 7,100 m² pranë Stadiumit “Air Albania” do t’i jepet investitorëve privatë për ndërtimin e një kulle me sipërfaqe deri në 60,000 m² dhe pesë kate nëntokë parkimi.
Në këmbim, 45% e sipërfaqes së ndërtimit do t’i kalojë shtetit. Kjo formulë e partneritetit publik–privat është përdorur edhe më herët nga KISH, por shpesh ka rezultuar me përfitime më të mëdha për privatët sesa për interesin publik.
Drejtoresha e jetimores, Valbona Imeraj, deklaroi për mediat se nuk është vënë në dijeni për projektin:
“Nuk di asgjë. Ne po vazhdojmë jetën normalisht dhe po përmirësojmë ambientet këtu ku jemi.”
Mungesa e transparencës dhe e konsultimit publik ka ngjallur shqetësime se prapa projektit qëndron një tjetër rast i xhentrifikimit të Tiranës, ku institucionet sociale po zhvendosen nga qendra për t’i hapur rrugë ndërtimeve luksoze.
Zona e Rrugës së Elbasanit, ku ndodhet “Zyber Hallulli”, është sot një ndër më të shtrenjtat në kryeqytet me çmime mbi 3,000 euro/m², çka forcon bindjen se vendimi është shtyrë nga interesat imobiliare.
Ekspertët e urbanistikës e cilësojnë këtë prirje si “spastrim social”, pasi zhvendos shtresat më të brishta në periferi dhe shndërron hapësirat publike në prona private.
Ndërkohë që qeveria shpenzon miliona për projekte luksoze si “Parku i Edenit” pranë Kryeministrisë, strehimi i fëmijëve jetimë po i besohet iniciativës së privatëve, një qasje që shumëkush e sheh si simbol të zhdukjes së kujtesës sociale të Tiranës./JOQ
Discussion about this post