Ndryshimet e fundit në kabinetin qeveritar në mandatin e tretë të Ramës nuk janë vetëm emrat e ministrave por edhe ndryshimet në strukturë ku janë shtuar tre ministra shteti dhe shkrirë Ministria për Diasporën.
Një ndër projektet kryesore të kësaj ministrie ishte ngritja e infrastrukturës së posaçme për të bërë të mundur që emigrantët shqiptarë që ndodhen në çdo skaj të botës të kenë mundësi të ushtrojnë të drejtën e tyre në proceset zgjedhore.
Ajo çka u evidentua në zgjedhjet e kaluara ishte bllokimi që iu bë emigrantëve të cilët donin të vinin në Shqipëri për të votuar në zgjedhjet e 25 prillit, pas vendimit të Komitetit Teknik që vendosi karantinim 2 javor të të gjithë atyre që hyjnë në Shqipëri, vetëm 10 ditë para zgjedhjeve, çka ua bënte të pamundur emigrantëve marrjen pjesë në procesin zgjedhor.
