Zhegrova dhe lojtarët dardanë dhurojnë mijëra euro për fëmijët në nevojë

në Sport

Kohë leximi: 3 min

Përfaqësues të Federatës së Futbollit të Kosovës, në krye me kryetarin Agim Ademi dhe përzgjedhësin Franco Foda, së bashku me lojtarët Edon Zhegrova, Florent Muslija dhe Arijanet Muric kanë vizituar SOS Fshatin e Fëmijëve në Prishtinë, ku me përveç takimeve më fëmijë, kanë ndarë edhe një shumë parash si donacion.

Gjatë ditës së djeshme (e martë), fëmijët e SOS Fshatit në Prishtinës patën një befasi të madhe, pasi dyert e tyre u trokitën Zhegrova, Muric dhe Muslija, të shoqëruar nga kryetari i FFK-së, Agim Ademi dhe përzgjedhësi Franco Foda.

Sipas faqes zyrtare të SOS-it, fshati gumëzhinte nga zhurma e fëmijëve që vraponin për të përqafuar yjet e Kombëtares së Kosovës në futboll dhe për të biseduar me ta, teksa pyetjet nuk kishin të sosur.

Në SOS Fshat gjendet një djalosh i talentuar me emrin Dreni, i cili është i apasionuar pas futbollit dhe ëndërron të luajë për Barcelonën.

Ai, kishte një pyetje të veçantë për Edonin: donte të dinte me kë ëndërron Zhegrova të luajë, dhe Edoni iu përgjigj se ëndrra e tij është të luajë në një ekip me Messin.

Përveç Zhegrovës, Edoni kishte pyetje edhe për gardianin e portës së Kosovës, Muric, i cili pyet nëse kishte menduar ndonjëherë të luajë basketboll.

Dreni kishte sjellë më vetë edhe topin e tij të vjetër të futbollit, të cilin Zhegrova, Muric dhe Muslija e nënshkruan, që ta ketë si kujtim të kësaj dite.

Aty nuk mungoi as loja e futbollit, ku talenti i fëmijëve të SOS Fshatit në Prishtinë i la të gjithë të habitur.

Në fund, kryetari i FFK, Agim Ademi, njoftoi se FFK së bashku me Muslijën, Muric dhe Zhegrovën do të dhurojnë 4,000 euro për fëmijët e SOS Fshatit, një kontribut i jashtëzakonshëm për rritjen dhe mirëqenien e tyre.