Zyrtarë të Bashkimit Evropian nuk janë duke fshehur zhgënjimin për përpjekjet e dështuara për të hapur negociatat e anëtarësimit me Shqipërinë dhe Maqedoninë e Veriut, para përfundimit të presidencës portugeze të BE-së.
Portugalia përfundon kryesimin e saj në fund të muajt qershor dhe pas saj radhën e ka Sllovenia.
Në takimin e fundit të Këshillit për Çështje të Përgjithshme të BE-së në Luksemburg, presidenca portugeze ka konstatuar se nuk ekziston konsensus i nevojshëm për të miratuar kornizat negociuese për këto dy shtete kandidate, si kusht për të hapur negociatat.
Sipas vlerësimit të Komisionit Evropian, edhe Shqipëria edhe Maqedonia e Veriut, i kanë përmbushur të gjitha kushtet e nevojshme për të hapur negociatat.
Por vendimet në Këshill miratohen vetëm me pajtimin e të gjitha shteteve anëtare.
Shumë diplomatë evropianë kanë shprehur zhgënjimin e tyre me një situatë të tillë duke e quajtur si “të dëmshme për paqen dhe stabilitetin në rajon” si dhe “gabim strategjik, i cili do ta dobësojë edhe më shumë imazhin e BE-së në rajon”, thonë disa burime të Radios Evropa e Lirë.
Disa diplomatë evropianë kanë kërkuar që, çështjet e hapura bilaterale, të cilat mund t’i ketë ndonjë shtet anëtar i BE-së me ndonjë vend të rajonit të Ballkanit, nuk duhet të përdoren për bllokimin e procesit të zgjerimit dhe nuk duhet të jenë fare pjesë e këtij procesi.
Blloku evropian tani pret që pas zgjedhjeve të jashtëzakonshme në Bullgari të ketë më shumë gatishmëri në këtë shtet që të pajtohet me miratimin e kornizës negociatore, e cila do të hapte edhe rrugën për nisjen e negociatave të anëtarësimit./REL
