Nga Gjermania te Brazili dhe Holanda, 10 dështimet më të mëdha në Botëror

Kupa e Botës 2026 ka prodhuar emocione të mëdha, por edhe zhgënjime të thella.

Disa nga kombëtaret më të forta të planetit nuk arritën të justifikonin pritshmëritë, duke u eliminuar shumë më herët nga sa pritej ose duke zhvilluar një turne larg nivelit të tyre.

Në vendin e dhjetë renditet Republika Çeke, e cila grumbulloi vetëm një pikë në fazën e grupeve.

Pas eliminimit, Patrik Schick u tërhoq nga kombëtarja, ndërsa trajneri Miroslav Koubek dha dorëheqjen.

Skocia zë vendin e nëntë, pasi nuk arriti të kalonte grupin, duke regjistruar eliminimin e 13-të radhazi në fazën e grupeve të një turneu madhor.

Ekuadori renditet i teti, me një Botëror plot luhatje që përfundoi me dorëheqjen e trajnerit Sebastian Beccacece.

Në vendin e shtatë është Brazili.

Pesë herë kampionët e botës u eliminuan nga Norvegjia që në fazën e 1/16-ave, ndërsa projekti i Carlo Ancelottit u vu menjëherë në pikëpyetje.

Holanda renditet e gjashta, pasi u eliminua nga Maroku në raundin e parë me eliminim direkt, pavarësisht se konsiderohej një nga favoritët për trofeun.

Pas saj vjen Portugalia, e cila, edhe pse u eliminua nga Spanja, nuk arriti të bindte me lojën e saj në asnjë moment të turneut.

Në vendin e katërt është Koreja e Jugut, eliminimi i së cilës u konsiderua një katastrofë kombëtare.

Presidenti i vendit kërkoi hetim për dështimin, ndërsa trajneri Hong Myung-bo u përball me kritika të forta.

Podiumi i zhgënjimeve hapet me Uruguain në vendin e tretë, mes rezultateve të dobëta, tensioneve të brendshme dhe dorëheqjes së Marcelo Bielsës.

Turqia renditet e dyta, pasi dështoi të kalonte fazën e grupeve, pavarësisht pritshmërive të mëdha ndaj skuadrës së Vincenzo Montellës.

Dështimi më i madh i Botërorit 2026, sipas kësaj renditjeje, i takon Gjermanisë.

Katër herë kampionët e botës u eliminuan nga Paraguai në fazën e 1/16-ave, në atë që u konsiderua surpriza më e madhe e turneut.

Pas këtij dështimi, federata gjermane vendosi t’ia besojë kombëtaren Jurgen Kloppit, me shpresën për ta rikthyer ekipin në majat e futbollit botëror.