Ministrja Elva Margariti ka reaguar pas incidentit që pati sot me deputeten Ina Zhupa në Komisionin e Edukimit. Teksa ministrja po fliste për projektligjin “Për miratimin e marrëveshjes për administrimin e nënzonave të trashëgimisë kulturore dhe peizazhit kulturor, pjesë e Parkut Kombëtar të Butrintit”, Zhupa u ngrit dhe i hoqi mikrofonin ministres, ndërsa kjo e fundit e quajti antifemër. Me anë të një postimi në Facebook, Margariti shkruan se publikut iu servir një spektakël i shëmtuar dhe një akt brutal që nuk ka të bëj me statusin politik por me statusin e qytetarisë. Ajo gjithashtu ka shkruar se në zgjedhësh dhunën në vend të fjalëve është si të zgjedhësh ulërimat në vend të argumentit.
Sot publikut iu servir një “spektakël” i shëmtuar gjatë një seance dëgjimore në Kuvend, për një çështje me rëndësi strategjike si ajo e mirëmenaxhimit të Parkut Kombëtar të Butrintit. Një akt brutal, i cili nuk ka të bëjë me kostumin politik, por me statusin e qytetarisë në mjedisin publik. Si grua dhe si nënë, nuk e di se me çfarë guximi do të kthehesha në shtëpi, nëse do ta dija se ime bijë apo çdo bashkëmoshatar i saj do të më kishte parë në ekran, duke shkulur mikrofonë e duke i rënë tavolinës me grushte!!
Nuk arrij dot ta vendos veten në pozicionin e një gruaje tjetër, që abuzon me besimin e dhënë si përfaqësuese e një komuniteti, duke harruar se në radhë të parë është një figurë publike dhe detyrimisht një shembull publik. Të zgjedhësh forcën e dhunës në vend të forcës së fjalës dhe në vend të argumentit të zgjedhësh ulërimat, kjo fatkeqësisht ndodh në mjedisin tonë publik, por kur këtë e bën një grua kjo të le pa frymë dhe pa fjalë. Gjithsesi, si Ministre Kulture do të doja të siguroja çdokënd se nuk ka asnjë marrëveshje “sekrete” për të “shitur” Butrintin. Ka qenë dhe do të jetë pronë e shtetit shqiptar, madje edhe përtej pretendimeve të një pronari që një parti tjetër ia njohu Butrintin si trashëgimi familjare”, tha ajo.
Ndërsa theksoi se ndihet mirë për faktin që deputetë të opozitës dënuan veprimin e Zhupës dhe kritikuan atë.
Discussion about this post