Deputetja e Partisë Demokratike, Ina Zhupa, ka kërkuar përjashtimin e kreut të Grupit Parlamentar të Partisë Socialiste, Taulant Balla, nga punimet e Kuvendit për shkak të gjuhës fyese të përdorur ndaj deputetes demokrate Albana Vokshi.
Kërkesa u bë gjatë mbledhjes së Komisionit për Evropën dhe Punët e Jashtme, ndërsa Zhupa iu referua tensioneve të krijuara një ditë më parë në seancën parlamentare të së enjtes, ku, sipas saj, Balla përdori një shprehje fyese ndaj Vokshit duke i thënë: “për ty kam numrin me 0900”.
Ajo theksoi se maxhoranca ka promovuar ligjin për barazinë gjinore dhe se një deklaratë e tillë, sipas saj, bie në kundërshtim me parimet që synon të mbrojë ky ligj.
Sipas Zhupës, në seancën e djeshme u cenua dinjiteti i një gruaje dhe një nëne, duke shtuar se nga Kuvendi, si institucioni më i lartë i përfaqësimit të qytetarëve, nuk duhet të dalin mesazhe që prekin dinjitetin njerëzor.
Zhupa shtoi gjithashtu se kërkesa për përjashtimin e Ballës nga Kuvendi duhet të firmoset nga të gjitha deputetet gra, si një akt qytetar që synon të kërkojë reflektim nga të gjitha palët politike.
“Dje në sallën e Kuvendit, në një mënyrë të paprecedentë dhe jashtë çdo norme morale e ligjore të rregullores, bashkëjetesës brenda një salle, që duhet të ishte më e larta e përfaqësimit të qytetarëve, Balla ka cenuar dhe prekur dinjitetin njerëzor të koleges tonë, Albana Vokshi. Ky kuvend miratoi me goxha propagandë një ligj që ishte edhe ligj për të diskutuar por thelbi që donit ju ishte dhuna ndaj grave. Minimumi ky Komision, që ka për nënkryetare Vokshin të mbajë një qëndrim dhe të distancohet nga dhuna.
Të dalë me një deklaratë të përbashkët si komision, që mbështet ligjin e barazisë gjinore, të mbështesë atë që thotë progres raporti për Shqipërinë. Nëse ky komision që nuk e kalon dot mesazhin që kur cenohet nënkryetarja duke cenuar edhe standartet më të larta të bashkëjetesës normale e morale brenda kuvendit, duhet të distancohet, të mbajë një qëndrim, të kërkojë që kuvendi të mbajë një qëndrim dhe të merren masa ndaj zotit Balla për fjalon e përdorur në sallën e Kuvendit. U cenua një zonjë, nënë e motër. Zonja Vokshi ka dy vajza në shtëpi që e ndjekin kuvend dhe nuk mund të kalojë nga ai kuvend ato mesazhe që prekin dinjitetin njerëzor të kujtdo. Propozimi për përjashtimin e zotit Balla duhet të jetë propozim i të gjitha zonjave dhe demokrate, ta firmosim së bashku dhe të jetë akt qytetarie për të kërkuar reflektimin e mëtejshëm të të gjitha palëve”, u shpreh Zhupa.
Discussion about this post