Një ditë pas ngjarjeve në selinë blu, me protagonist ish-kryeministrin Sali Berisha, kreu demokrat Lulzim Basha ka bërë lëvizjen e radhës duke thirrur në seli disa nga ambasadorët e vendeve të fuqishme.
Pjesë e takimit mësohet të jenë ambasadorja e Shteteve të Bashkuara të Amerikës, Yuri Kim, i Bashkimit Evropian, Luigi Soreca, i Gjermanisë, Peter Zingraf, i Britanisë së Madhe, Alastair King-Smith dhe ajo franceze Elisabeth Barsacq, të cilët duke shkuar në takim pohojnë në një farë mënyrë mbështetjen e tyre për Bashën.
Nëse për ambasadorët e vendeve të tjera, mund të kishte dyshime, e dërguara e SHBA-vë, Yuri Kim ka konfirmuar mbështetjen e saj për liderin e PD që në fillimet e përplasjes më ish-kryeministrin, kjo dhe për faktin e shpalljes së tij non-grata nga SHBA-të.
Vazhdimisht Kim ka bërë thirrje që PD të ndahet nga korrupsioni, dukë nënkuptuar këtu ish-kryeministrin madje thuhet loboi fuqishëm që Lulzim Basha ta përjashtonte atë nga grupi parlamentar i PD, qëllim të cilit ia arriti. Edhe para mbajtjes së Kuvendit të thirrur nga Berisha më 11 nëntor, Kim i ka bërë thirrje demokratëve të mos e mbështetin pasi sipas saj, SHBA nuk do të jenë më aleti më i afërt i PD nëse Berisha rikthehet në krye të partisë.
Ndërsa, sa i përket ambasadorëve të tjerë, ata nuk kanë reaguar deri para mbajtjes së Kuvendit të Berishës, kur delegacioni i BE në Tiranë dha një mesazh të fortë duke i bërë thirrje institucioneve që të intensifikojnë veprimet e tyre kundër korrupsionit dhe të nxjerrin para drejtësisë ata që janë të përfshirë në akte korruptive.
Sa i përket ambasadorëve nga vendet e tjera, nuk kishte pasur reagime deri në momentin e sotëm, ku në heshtje pohuan qëndrimin e tyre pro Bashës.
Discussion about this post