Për shkak të zjarrit që shpërtheu mëngjesin e sotëm në një burg në shtetin amerikan të Teksasit, më shumë se 650 të burgosur janë evakuuar, por nuk ka të lënduar.
Të burgosurit u zhvendosën në pjesë të tjera të burgut në Huntsville, rreth 105 kilometra në veri të Houstonit, tha Amanda Hernandez, zëdhënëse e Departamentit të Korrigjimeve të Teksasit.
Mësohet se zjarri ka përfshirë nënkulmin dhe katin e tretë të ndërtesës administrative dhe nënkulmi i njësisë ku ndodhen të burgosurit.
Zjarri u frenua gjatë mëngjesit, por zjarrfikësit “po shuajnë ende zjarre të vogla në disa zona”, tha shefi i zjarrfikësve në Huntsville.
Shkaku i zjarrit do të hetohet pasi të jetë shuar plotësisht, tha Hernandez.
Burgu 174-vjeçar i Huntsville është ndërtuar në vitin 1849 dhe ka një kapacitet për 1 700 të burgosur, ndërkohë që aktualisht vuajnë dënimin rreth 1 600 persona. Në burg zbatohen dënimet me vdekje për të dënuarit.
Discussion about this post