Një zjarr ka shpërthyer në nënstacionin elektrik të Draçinit në Shkodër, duke shkaktuar ndërprerje të energjisë elektrike në disa zona të qytetit.
Arsyet e shpërthimit të zjarrit ende mbeten të paqarta, por dyshohet se mund të jetë shkaktuar nga një defekt në pajisjet e nënstacionit. Zjarri ka përfshirë edhe dy nënstacione të tjera elektrike, duke përkeqësuar situatën.
Si pasojë, një pjesë e qytetit të Shkodrës është pa furnizim me energji elektrike.
Banorja e zonës, Zenepe Lopci, ka deklaruar se situata e krijuar ka qenë e tmerrshme dhe se ka dëgjuar shpërthime.
“U prek gjysma e dritave të shtëpisë, gjysma kishte dhe gjysma jo. Dal jashtë tek veranda në katin e dytë të shtëpisë, pash shkëndijën në nënstacion dhe më pas kam marrë telefonin për të marrë zjarrfikësen.
Kur po zbrisja shkallët kam parë flakën që kishte nisur afër repartit, pas 5 minutash ka shpërthyer tek nënstacioni. Prapë merrja zjarrfikësit nuk vinin. Unë isha me një fëmijë të vogël dhe isha vetëm në shtëpi. Këtë tmerr që kam përjetuar sot.
Kisha frikë se do të shpërthenin bojërat apo gjërat që ka nënstacioni, që me shpërthy. Kam marrë vetëm çantën dhe nja dy lekë, e kam dalë e kam ikur së bashku me fëmijën e vogël. Nuk mund të hynim brenda”, ka deklaruar banorja.
Njoftimi i policisë
Rreth orës 11:30, dyshohet se për shkak të shkëndijës elektrike ka rënë zjarr në kabinën elektrike të një pallati në rrugën “Vëllezërit Frashëri”. Shkëndija në kabinë ka shkaktuar masë elektrike në nënstacionin elektrik në vendin e quajtur “Draçin”. Si pasojë, në nënstacion është ndezur zjarr dhe përhapja e flakëve ka shkaktuar zjarr dhe në magazinën në pronësi të shtetases R. L., 34 vjeçe, objekt që ndodhet në afërsi të nënstacionit. Nga zjarret ka vetëm dëme materiale.
Discussion about this post