Zjarr në një shkollë në Kenia, humbin jetën 17 nxënës

Të paktën 17 nxënës kanë humbur jetën si pasojë e një zjarri që përfshiu një shkollë në Kenian qendrore.

Autoritetet kanë bërë me dije se numri i viktimave mund të rritet pasi shumë prej nxënësve kanë pësuar djegie të rënda dhe ndodhet në gjendje kritike për jetën.

Shkaku i zjarrit në Hillside Endarasha Primary në qarkun Nyeri është duke u hetuar, tha zëdhënësja e policisë Resila Onyango për mediat lokale.

Një ekip hetuesish është vendosur në shkollë.

Kryqi i Kuq i Kenias tha se po ofron shërbime të mbështetjes psikosociale për nxënësit, mësuesit dhe familjet e prekura.

Në vitin 2017, 10 studentë vdiqën në një zjarrvënie në shkollën e mesme Moi Girls në kryeqytetin Nairobi.

Të paktën 67 studentë vdiqën në qarkun Machakos, në jug-lindje të Nairobit, në zjarrvënien më vdekjeprurëse të shkollës keniane që ndodhi më shumë se 20 vjet më parë.