Vajza 6-vjeçare, e lënduar rëndë nga zjarri që përfshiu banesën e saj në Maliq, është transportuar urgjentisht drejt Tiranës për trajtim të specializuar mjekësor. Sipas Spitalit Rajonal të Korçës, e mitura ndodhet në gjendje kritike për jetën për shkak të djegieve të shumta në trup.
Vajza u gjet jashtë banesës, në gjendje të vetëdijshme, por me dëmtime të rënda. Ndërsa vëllai i saj 14-vjeçar, Luka Azisllari, u gjet në gjendje kome dhe ndërroi jetë pak orë më vonë në spital, si pasojë e asfiksisë dhe djegieve.
Ngjarja tragjike ndodhi mesditën e së dielës në bllokun nr. 3 të qytetit të Maliqit, ku një zjarr i papritur përfshiu banesën ku jetonte nëna, 40-vjeçarja Merjeme Azizllari, dhe dy fëmijët e saj. Ajo u gjet pa shenja jete pranë derës së kuzhinës, pasi kishte tentuar të shpëtonte fëmijët nga flakët.
Shkaqet e zjarrit janë ende nën hetim, por dyshohet se zjarri ka nisur nga një sobë me dru që familja përdorte për ngrohje. Fqinjët tregojnë se familja Azisllari përballej me kushte të vështira ekonomike dhe se fëmijët vuajnë nga probleme shëndetësore.
Ngjarja ka tronditur komunitetin lokal dhe autoritetet po vijojnë hetimet për të sqaruar plotësisht rrethanat e tragjedisë.
Discussion about this post