Një natë tmerri dhe dëshpërimi ka përfshirë banorët e Delvinës, të cilët thonë se janë lënë në mëshirë të fatit përballë flakëve të mëdha. Zjarri masiv i rrethoi, ndërsa ata shprehen të zhgënjyer nga mungesa e ndërhyrjes së autoriteteve shtetërore dhe Emergjencave Civile.
Në deklaratat e tyre për mediat, banorët theksojnë se zgjidhja e vetme ishte ndërhyrja ajrore, e cila, sipas tyre, erdhi me shumë vonesë. “Nuk kanë ndërhyrë në kohë, ka patur shumë vonesa. Emergjencat s’kanë qenë fare, prefekti ka ardhur në orën 2 të mëngjesit,” shprehet një prej tyre. Një tjetër, i cili i kishte humbur ullinjtë dhe mallin, i kërkonte mediave të ankoheshin te kryeministri.
Zjarrfikësit pa fuqi, ndërhyrje e vonuar ajrore
Banorët kanë shprehur mirënjohje për zjarrfikësit, por theksojnë se ata ishin të lodhur dhe me pajisje të vjetruara, duke e bërë të pamundur frenimin e flakëve të ndihmuara nga era e fortë. “Ata janë të lodhur, të mbaruar dhe nuk kanë fuqi. I prita të vinin por na lanë në mëshirë të fatit,” rrëfen një banor.
Gjatë natës, zjarri i rrethoi banorët e Delvinës, të cilët u detyruan të qëndronin në rrugë, ndërsa dëgjoheshin shpërthime të herëpashershme municionesh. Përballë kësaj situate kritike, vetëm në orët e para të mëngjesit të sotëm ka filluar ndërhyrja ajrore, ndërsa Shqipëria, si në çdo vit, po kërkon ndihmë nga vendet fqinje për të përballuar flakët me avionë të specializuar.
Në terren, forca të shumta zjarrfikëse, ushtri dhe banorë u angazhuan për të mbrojtur qytetin nga flakët. Rreth 10 persona, duke përfshirë 4 ushtarë, u trajtuan për probleme me frymëmarrjen dhe plagë të lehta. Sipas raportimeve, dy persona kanë humbur jetën nga zjarret në Qarkun e Elbasanit.
Discussion about this post