Në zjarret pyjore që po vazhdojnë prej një jave në ishullin portugez Madeira që gjendet në Oqeanin Atlantik, deri më tani janë shkrumbuar më shumë se 5 mijë hektarë tokë, që përbën 6 për qind të sipërfaqes së ishullit.
Zjarret, të cilat filluan më 14 gusht në ishullin Madeira dhe të cilat ende nuk janë marrë nën kontroll, po shkaktojnë shqetësim, veçanërisht në Camara de Lobos dhe Ponta do Sol në bregdetin jugor të ishullit, si dhe në rajonin malor Pico Ruivo.
Sipas të dhënave të Sistemit Evropian të Informacionit për Zjarret në Pyje, zjarret kanë prekur deri tani më shumë se 5 mijë hektarë tokë.
Agjencia Kombëtare e Emergjencave dhe Mbrojtjes Civile (ANEPC), e cila mori kritika të ashpra nga sindikatat dhe partitë opozitare për mungesën në luftën kundër zjarreve, dërgoi një forcë shtesë prej 60 personash në rajon.
Sipas lajmeve në mediat portugeze, më shumë se 400 zjarrfikës dhe 120 policë pyjorë, si dhe rreth 200 pjesëtarë të personelit të mbrojtjes civile, 40 automjete dhe një avion po punojnë në luftën kundër zjarrit në Madeira.
Kreu i qeverisë autonome të Madeiras, Miguel Albuquerque, duke theksuar se zjarri vazhdon në zona të vështira për t’u arritur dhe jashtë vendbanimeve, tha: “Nuk ka asnjë kërcënim për popullsinë, shtëpitë dhe infrastrukturën.
Ndërhyrja e deritanishme është në rregull”. Për shkak të zjarreve, shumica e turistëve janë larguar nga ishulli.
Discussion about this post