Situata e zjarreve në Krujë vijon të mbetet e vështirë, ndërsa një vatër është riaktivizuar në lagjen ‘Abaze’ të qytetit.
Dyshohet se zjarri është riaktivizuar nga era e fortë, e cila mund të ketë ndezur sërish trungje që nuk ishin shuar plotësisht.
Në lagjen ‘Abaze’, banorët janë detyruar të ndërhyjnë me mjete rrethanore, së bashku me forcat zjarrfikëse, pasi terreni i vështirë e bën të pamundur ndërhyrjen me mjete zjarrfikëse.
Ndërkohë, një tjetër vatër vijon të jetë aktive në Krastë, në afërsi të depove të eksplozivit në zonën e Zidonës.
Era po favorizon përhapjen dhe riaktivizimin e flakëve, duke e bërë veçanërisht të vështirë kontrollin e situatës nga toka.
Për përballimin e zjarrit është angazhuar edhe një helikopter, i cili vijon ndërhyrjet nga ajri, duke lëvizur mes zonës së Abazes dhe Zidonës.
Situata paraqitet problematike, pasi terreni i thyer dhe era e fortë po vështirësojnë ndërhyrjen e forcave në tokë.
Forcat zjarrfikëse dhe banorët vijojnë përpjekjet për izolimin e vatrave, ndërsa helikopteri po ndërhyn nga ajri për të frenuar përhapjen e flakëve.
Discussion about this post