Një ngjarje tragjike ka tronditur qytetin e Maliqit, ku një zjarr i përmasave të rënda ka përfshirë banesën e familjes Azisllari, duke shkaktuar vdekjen e dy personave dhe plagosjen rëndë të një fëmije të mitur.
Viktimat janë një grua 40-vjeçare, e cila humbi jetën si pasojë e asfiksisë, dhe djali i saj 14-vjeçar, i cili ndërroi jetë pak më vonë si pasojë e plagëve të marra.
Vajza 6-vjeçare e familjes ndodhet në Spitalin Rajonal të Korçës, në gjendje të rëndë shëndetësore dhe po merr trajtim intensiv nga mjekët.
Sipas informacioneve paraprake nga autoritetet, shkaku i zjarrit dyshohet të ketë qenë një sobë me dru, e lënë ndezur në orët e natës.
Familja Azisllari jetonte në kushte të vështira ekonomike, fakt i konfirmuar edhe nga komshinjtë. Njëri prej tyre, Sefer Shkëmbi, u shpreh se:
“Unë jam komshi këtu, fëmijët ishin me autizëm, ndërsa mamaja ishte mirë. Nuk punonte, ishte shtëpiake. Vetëm burri punonte. Ishin në kushte të vështira ekonomike.”
Ngjarja ka tronditur komunitetin lokal, ndërsa autoritetet kanë nisur hetimet për të zbardhur rrethanat e plota të zjarrit që i mori jetën dy anëtarëve të një familjeje të pafajshme.
Zjarri tragjik ngre sërish alarmin për rreziqet e pajisjeve ngrohëse në kushte të papërshtatshme banimi, veçanërisht në familje që jetojnë në varfëri të thellë. abc
Discussion about this post