Aktivisti dhe pedagogu Ervin Goci ka reaguar lidhur me zjarrin që përfshiu “Sarajet e Toptanëve”, duke thënë se ishte i qëllimshëm. Me bindje ai ka treguar se vila do të shembet e se aty do të ndërtohet një pallat.
Teksa ndodhej mëngjesin e sotëm përballë monumentit, ai shprehet për gazetarët se hetuesit kanë mbërritur në vendin e ngjarjes 12 orë me vonesë.
“Ja tani po vijnë hetuesit, shikoni. Jemi në orën 10 e 10, jemi 10 orë, 12 orë në distancë në kohë. Është normale që vijnë pas kaq orësh dhe vijnë pasi kryetari i Bashkisë nxjerr videon. Kjo është bërë qellimisht se duan të marrin pronën. Nga informaçionet që kam, guxoj ta them që këtu duan të ndërtojnë pallat. Siç e bëri me teatrin, që ka një copë bakalli, ju e kuptoni vetë që është një çështje që kërkon hetim të thellë. Kërkoj që gazetarët të shkojnë të Ministria e Kulturës dhe të pyesin se përse nuk ka pasur roje. Unë si qytetar kërkoj që kjo të ruhet. Në radhë të parë ruhet godina, ruhet vlera. Skenari është ta hedhin në tokë dhe të ndërtojnë pallat. Të gjithë e kanë në dorë që kjo mos të ndodhë.
Unë me thënë të drejtën në rastin e kësaj, aktivisti nuk mund të bëjë punën e institucioneve, se ato e hodhën në rrugë. Ne ndejtëm 2 vjet e gjysëm te Teatri dhe thamë vlen, kjo e ka statusin, pse nuk ka pasur roje këtu. Këtu janë përgjgjës direkt institucionet. Ministrja e Kulturës duhet të japë llogari. Është një denoncim i bërë me dhjetra herë. Sot janë 30 monumente që disa janë të shembura dhe të tjera të braktisura. Ne e kemi bërë publik dhe nuk është dhënë asnjë reagim”, tha Goci.
