Kryeministri i Maqedonisë së Veriut, Zoran Zaev paralajmëron se së shpejti publikohet raporti përfundimtar i hetimit për zjarrin në spitalin Covid të Tetovës.
Zaev kërkon që ai raport të publikohet sa më shpejt të jetë e mundur.
Ai shton se edhe si kryeministër duhet që të mbajë qëndrim rreth dorëheqjeve të dhëna së pari nga Ministri i Shëndetësisë, Venko Filipçe dhe të tjerët.
“Sa më shpejtë që është e mundur, aq më mirë, që ti zgjidhim të gjitha dilemat. Jeta vazhdon, politikanët janë në fushatë, po ndodhin aktivitete të përditshme. Është e udhës që të publikohet ai raport, që të mund dhe unë të them qëndrimin tim rreth dorëheqjeve të ofruara nga ministri, zëvendësministri”, tha Zaev.
Rikujtojmë se një zjarr i fuqishëm shpërtheu në një spital të Tetovës ku trajtoheshin të sëmurët me Covid. 14 vetë kanë humbur jetën, e 12 të tjerë janë lënduar.
