Ngjarja e rëndë e tetë tetorit e cila u mori jetën katërmbëdhjetë pacientëve në spitalin e Tetovës, mbetet ende e pazbardhur plotësisht, pavarësisht se hetimet kanë vijuar. Ditën e sotme Prokuroria Themelore e Tetovës ka bërë një raport lidhur me shpërthimin i cili tronditi Tetovën.
Sipas raportit, zjarri dyshohet se ka shpërthyer nga një kabllo vazhduese ku ishte vendosur defibrillatori , pajisje kjo e cila monitoron dhe rregullon ritmin e zemrës. Gjithashtu në raport shënohet se zjarri është shkaktuar nga mbinxehja e kabllos me të cilën ishin lidhur defibrillatori, karikuesi i telefonit dhe një pajisje tjetër. Në ditët në vijim do të ketë dhe një tjetër njoftim nga prokuroria për të bërë me dije se në cilën pikë kanë shkuar hetimet.
Në momentet kur ngjarja ndodhi, dhanë dorëheqjen katër zyrtarë, ministri i Shëndetësisë, zëvendësministri dhe dy drejtorët e spitalit ku trajtoheshin të prekurit me Covid-19.
Për të dhënë ndihmë në zbardhjen e plotë të ngjarjes është kërkuar ndihma e ekspertëve gjermanë.
