Policia ka ndaluar administratorin e pallatit që u përfshi nga flakët në Tiranë, në zonën e ish-Parkut të Autobusëve, por edhe pronarin e apartamentit në katin e fundit, ku dyshohet se nisi zjarri që më pas u përhap në pothuajse të gjithë godinën 10 katëshe.
Dyshimet e para janë se zjarri është shkaktuar nga një shkëndijë elektrike, ndërkohë që Policia po heton ngjarjen.
Nga raportimet mësohet se policia po mbledh dëshmitë e banorëve të pallatit, sikundër po merr në pyetje edhe banorët e katit të fundit. Gjithashtu nga Bashkia e Tiranës u njoftua se ka nisur një hetim, por pa specifikuar se në ç’drejtim.
Zyrtarisht shkaku i rënies së zjarrit në pallatin 10 katësh nuk është përcaktuar, ndërsa përhapja e flakëve në fasadën e pallatit duket se ka lidhje me materialin që është përdorur, që ka favorizuar përhapjen e flakëve.
Të paktën kjo është pohuar edhe nga kreu i Shërbimit Zjarrfikës të Tiranës, i cili u shpreh se kjo ishte hera e parë kur zjarrfikësit e kryeqytetit përballeshin me një situatë të tillë.
Discussion about this post