Reshjet e dendura të shiut dhe moti i keq që ka përfshirë vendin duke përmbytur një pjesë të Shqipërisë ka ngritur shqetësime serioze edhe për zonën e nën-Shkodrës, e cila bie nën mëshirën e motit të keq pothuajse çdo vit duke u përmbytur.
Shkak për këtë bëhen dhe ndërhyrjet e munguara për kanale kulluese. Administratori i Dajçit, një prej zonave të rrezikuara , Gjovalin Darragjati ka kërkuar që në kolektorin e Bërdicës të vendosen 5 porta që të shmanget vërshimi i ujërave që përmbyt toka e shtëpi në Darragjat e Shirq. Teksa zonat më të rrezikuara mbeten njësitë administrative të nën Shkodrës, si Dajçi, Ana e Malit dhe Bërdic, institucionet përgjegjëse kalojnë fajin tek njëra tjetra e nuk japin zgjidhje. Detyrimi që të kryhen këto ndërhyrje i ka bordi rajonal i kullimit Lezhë, i cili ende nuk ka vepruar.
“Uji vërshon krejt lirshëm, dhe këto porta janë rregullator për Verës për Ujitje dhe Dimrit për mospërmytje. Është premtuar që do ndërhyhet dhe deri në këtë moment që flasim nuk është ndërhyrë” u shpreh Gjovalin Darragjati.
Në zonën e nën-Shkodrës nuk ndërhyhet prej 60 vitesh, teksa hapjen e portave të hidrocentraleve rrit rrezikun çdo vit , pasi shkarkimet rrisin prurjet në Drin e Bunë dhe vërshimi i ujërave bëhet i pashmangshëm duke marrë para çdo gjë që gjen. Ndërsa banorët presin çdo vit që pushteti vendor dhe ai qendror të kthej sytë nga zona e Nënshkodrës.
Discussion about this post