Prej orës 10:30 të mëngjesit ka nisur seanca e mbrojtjes së ish-kryeprokurori Adriatik Llalla, ku ai vetë mungoi sërish. Kjo është seanca e katërt që zhvillohet për gjykimin e Llallës, ku dhe në korrik ai nuk u paraqit.
Avokati Sokol Hazizaj ka hyrë në Gjykatën e Posaçme të Apelit dhe bëri parashtrimet që janë një hap larg vendimit të Gjykatës Antikorrupsion, ku ka kërkuar sërish pafajësinë e Llallës.
Seanca po monitorohet edhe nga ndërkombëtarët, dy përfaqësues të Ambasadës Amerikane, dhe një i OSBE që kanë qenë të pranishëm në çdo seancë. Nëse Llalla shpallet fajtor me formë të prerë ai duhet të dërgohet pas hekurave, por nuk dihet ende nëse vendimi do shpallet sot, ndonëse mbrojtja e ish-prokurorit është pretendimi i fundit i palëve.
Kujtojmë se nëse shpallet fajtor ai është ish-zyrtari më i lartë i Prokurorisë i dënuar, ndërsa nuk përfiton zbritje dënimi nga gjykimi i shkurtuar.
Ish-kryeprokurori u dënua më 20 maj nga Gjykata e Posaçme Kundër korrupsionit dhe krimit të organizuar e cila e dënoi atë me 2 vite. Gjykata po ashtu vendosi ti konfiskohen pasuritë dhe të mos ushtrojë asnjë funksion publik për 5 vite.
Ai u mor i pandehur nga SPAK pas një hetimi të nisur për të që prej vitit 2018 nga prokuroria e Durrësit e më pas ish prokuroria e krimeve të rënda. Ish kryeprokurori u shpall fajtor nga GJKKO lidhur me 3 episode, fshehjen e shpenzimeve për familjarët e tij në Gjermani në vlerën e 7050 eurove, fshehjen e shpenzimeve për lindjen e djalit në Amerikë në vlerën e 7700 dollarëve si dhe shpenzimet për ndërtimin e katit të 3 të banesës së tij.
Ambasadorja amerikane në Tiranë, Yuri Kim, i kërkoi kreut të SPAK, Arben Kraja një ditë më parë që të mos kurset askush i korruptuar.
Kujtojmë se Departamenti i Shtetit deri më tani ka vënë një shënjestër me masë ndalimi ndaj disa personazheve në Shqipëri, politikanë si Sali Berisha, Vangjush Dako dhe Tom Doshi si dhe ish-kryeprokurorin Adriatik Llalla.
