Zvicra ka përforcuar masat anti-covid ditën e sotme, për të parandaluar rritjen e infeksioneve dhe arritjen e variantit Omicron në shtetin e pasur. Bëhet me dije se nga java që vjen do të përdoren maskat me detyrim dhe paraqitja e certifikatës së vaksinimit për të marrë disa shërbime.
Qeveria gjithashtu ka kërkuar që njerëzit të punojnë nga shtëpia, ndërsa kompanitë do të kenë të drejtë që hyrjen t’ua lejojnë vetëm personave të vaksinuar ose të shëruar. Këto masa do të hyjnë në fuqi nga e hëna e 6 dhjetorit dhe do të jenë efektive deri më 24 janar. “Këshilli Federal tash për tash vlerëson se gjendja është shumë kritike. Paraqitja e variantit Omicron gjithashtu paraqet sfida të reja për menaxhimin e pandemisë”, thuhet në deklaratën e qeverisë.
Tri raste të variantit Omicron janë raportuar deri më tani në Zvicër. Personat e infektuar janë vendosur në izolim, ndërsa ata që kanë pasur kontakte me të infektuarit janë vendosur në karantinë.
Zvicra i ka ashpërsuar edhe rregullat për hyrje në territorin e saj. Udhëtarët nga 23 shtete duhet të kenë test me rezultat negativ për Covid-19 dhe të karantinohen për dhjetë ditë.
Discussion about this post