Ish-kryeministri Pandeli Majko ka reaguar ndaj marrëveshjes në parim mes Shqipërisë dhe Serbisë për hapjen e një konsullate serbe në Shkodër dhe një konsullate shqiptare në Bujanoc, duke e cilësuar krahasimin mes dy rasteve si të pajustifikuar.
Përmes një postimi në rrjetet sociale, Majko shprehet se një konsullatë serbe në Shkodër do të kishte “më shumë rëndësi se vetë minoriteti”, duke vënë në dukje numrin e vogël të serbëve që jetojnë në zonë.
Sipas tij, situata nuk mund të krahasohet me hapjen e një konsullate shqiptare në Luginën e Preshevës, e cila është e banuar kryesisht nga shqiptarë.
“Kundrejt hapjes së konsullatës serbe në Shkodër do të hapet konsullata shqiptare në Luginën e Preshevës. Krahasimi është më shumë se një ironi. Lugina e Preshevës është një vazhdimësi territoriale e banuar nga shqiptarët e mbetur në sovranitetin e Serbisë”, shkruan Majko.
Ai thekson gjithashtu se konsullata shqiptare në Bujanoc nuk kalon përmes Kosovës, ndërsa për të arritur në Shkodër nga Serbia ndërmjetësohet territori i Malit të Zi.
Në reagimin e tij, Majko argumenton se Shqipëria e ka trajtuar këtë marrëveshje si një procedurë standarde diplomatike, ndërsa, sipas tij, Serbia e sheh atë në një kontekst më të gjerë politik dhe gjeopolitik.
“Për Shqipërinë duket se konsullata është trajtuar si shprehje e interesit standard. Për Serbinë, që nuk njeh sovranitetin e Kosovës dhe diskuton identitetin e Malit të Zi, është diçka tjetër. Serbia në Shkodër ka marrë më shumë se një konsullatë”, përfundon ish-kryeministri.
gijotina.com/
Discussion about this post