Pesëmbëdhjetë janë kandidatët që kanë shprehur interes për postin e Drejtorit të Policisë së Shtetit, në përfundim të afateve të aplikimeve (18 Shtatori).
Lista u zyrtarizua këtë të enjte nga Ministria e Brendshme, institucion që ka nën varësi Policinë e Shtetit.
Procedura
Lidhur me procedurën e shpalljes së fituesit, ministria njofton se brenda 10 ditëve pune nga përfundimi i afatit të dorëzimit të shprehjeve të interesit, Komisioni i Posaçëm kryen vlerësimin paraprak, me qëllim verifikimin e plotësimit të kushteve ligjore.
“Në përfundim të vlerësimit paraprak, Komisioni harton listën e kandidatëve që plotësojnë kushtet ligjore dhe të kandidatëve që nuk i plotësojnë këto kushte, bazuar në dokumentacionin e paraqitur nga kandidati dhe dokumentacionin shtesë të mbledhur nga Komisioni. Komisioni merr vendim për përjashtimin e kandidatëve që nuk plotësojnë kushtet ligjore dhe i njofton me shkrim kandidatët e përjashtuar, në mënyrë të arsyetuar për shkaqet e përjashtimit. Komisioni organizon seancë dëgjimore me kandidatët dhe i njofton ata të paktën 3 ditë para seancës dëgjimore. Anëtarët e Komisionit vlerësojnë të gjithë informacionin e vënë në dispozicion prej kandidatëve, dokumentacionin e mbledhur dhe informacionin e marrë gjatë seancës dëgjimore dhe i dorëzojnë Ministrit renditjen e kandidatëve, së bashku me vlerësimet me shkrim”, sqaron MB. Më pas, ministri i propozon kryeministrit një nga kandidatët me vlerësimin më të lartë.
Komisioni i Posaçëm, sipas një udhëzimi të Ministrisë së Brendshme që mban datën 2 Shtator 2024, ka si kryetar një nga zëvendësministrat, i caktuar nga Ministri i Brendshëm. Ndërsa anëtarë janë sekretari i Përgjithshëm i Ministrisë së Brendshme dhe drejtori i Përgjithshëm i Agjencisë së Mbikëqyrjes Policore. Udhëzimi thotë se vendimet për kualifikimin ose s’kualifikimin e aplikantëve merren me shumicën e votave, ndërsa vendimet për vlerësimin e kandidatëve merren individualisht nga çdo anëtar i Komisionit.
Ish-kreu i Policisë së Shtetit, Muhamet Rrumbullaku njoftoi dorëheqjen pasi në krye të ministrisë së Brendshme erdhi Ervin Hoxha. Në 6 Shtator, ministri i ri njoftoi pas dorëheqjes së Muhamet Rrumbullakut, komandimin përkohësisht të Sokol Bizhgës në krye të Policisë. Ervin Hoxha njoftoi gjithashtu çeljen e aplikimeve për zgjedhjen e drejtuesit të ri.
Lidhur me garën, ka pasur aludime se është fiktive dhe se drejtori i ri është paracaktuar. Një ndër emrat e përfolur për tu katapultuar në krye të Policisë është Ilir Proda, emri i të cilit listohet mes 15 kandidatëve që kanë aplikuar për të marrë detyrën e numrit 1 të Policisë së Shtetit.
Kandidatët
- Adriatik Tafçiu
- Altin Mena
- Ardian Çipa
- Gentjan Shehaj
- Hajrulla Xhivini
- Ibrahim Disha
- Idajet Faskaj
- Ilir Proda
- Lutfi Minxhozi
- Neritan Nallbati
- Pëllumb Seferi
- Rebani Jaupi
- Sami Rasha
- Shemsi Prençi
- Skënder Hita
Discussion about this post