Irani ka fituar akses në një grup pajisjesh elektronike dhe serverash të konfiskuara gjatë një operacioni të fundit kërkimi të kryer nga policia shqiptare në një kamp që i përket organizatës MEK, shkruan media iraniane, e cila i referohet një zyrtari të Qeverisë iraniane.
Sepehr Khalaji, kreu i këshillit të informacionit të qeverisë iraniane, postoi të hënën në Tëitter se një dërgesë që përmbante disqe dhe kuti kompjuteri që i përkisnin MEK-së kishte mbërritur në Iran.
Ekspertët iranianë janë aktualisht të angazhuar në marrjen e të dhënave nga këto pajisje dhe identifikimin e lidhjeve të grupit terrorist dhe qelizave sabotuese, shtoi ai.
“Rezultatet kanë qenë premtuese deri më tani,” tha zyrtari.
Nuk dihet se sa e vërtetë është ky informacion, pra nëse pala shqiptare i ka dorëzuar Iranit kompjutera edhe servera të sekuestruar, ndërkohë që operacioni në kampin MEK u bë me urdhër të SPAK bazuar në një hetim të nisur, pas informacioneve që kishin marrë, për sulme kibernetike ndaj palëve të treta.
Sipas medias iraniane, forcat e policisë shqiptare hynë në kampin e MEK, të njohur si Ashraf-3, në rajonin veriperëndimor të kryeqytetit, Tiranë, më 20 qershor për shkak të angazhimit të tyre në “sulme terroriste dhe kibernetike” kundër institucioneve të huaja.
Autoritetet konfiskuan 150 pajisje kompjuterike të lidhura me aktivitete terroriste. Të paktën një person u vra dhe dhjetëra të tjerë u plagosën gjatë përleshjeve në kamp, raporton e njëjta media.
Më shumë se një javë më vonë, policia në Shqipëri hyri përsëri në kampin Ashraf-3 dhe forcat e sigurisë u vendosën në hyrje të kampit dhe kontrolluan të gjitha automjetet që dilnin nga vendi.
Në një deklaratë të lëshuar të dielën, Ministria e Inteligjencës e Iranit tha se po ndjek seriozisht terroristët përtej kufijve të vendit, pas një sërë operacionesh të suksesshme që çuan në arrestimin e individëve të lidhur me MEK.
Discussion about this post