Këshilltari i Presidencës ukrainase, Mykhailo Podolyak, bëri me dije se të hënën, më 14 mars, do të paraqesin rezultatet e para të bisedimeve me delegacionin rus.
Podolyak, që është pjesë e delegacionit ukrainas në bisedimet me Rusinë, u shpreh se bisedimet me Moskën po vazhdojnë në mënyrë të pandërprerë.
“Sërish. Negociatat po vazhdojnë pandërprerë përmes video-konferencave. Grupet punuese po punojnë vazhdimisht. Një numër i madh i çështjeve kërkojnë vëmendje të vazhdueshme. Të hënën, më 14 mars, një sesion negociues do të mbahet për të përmbledhur rezultatet paraprake”, shkroi ai në Twitter.
Më herët gjatë ditës së sotme, Podolyak tha se beson që brenda ditësh do të arrihen rezultatet e para nga negociatat me Rusinë. Ai përsëriti që kërkesat e Kievit janë që të arrihet armëpushim dhe të tërhiqen trupat ruse.
Edhe nga delegacioni rus kanë shprehur optimizëm se do të nënshkruhet një marrëveshje në ditët në vijim, por nuk janë dhënë detaje se për çfarë bëhet fjalë.
Podolyak nga ana tjetër u shpreh se Rusia po dëgjon me kujdes propozimet e Ukrainës.
Përveç bisedimeve në formatin online, Ukraina dhe Rusia kanë zhvilluar tri runde bisedimesh në Bjellorusi. Kryediplomatët e të dy shteteve janë takuar po ashtu në Antalia të Turqisë.
Kujtojmë se, Rusia nisi sulmin e paprovokuar kundër Ukrainës më 24 shkurt. Për shkak të agresionit rus ndaj Kievit, shtetet perëndimore kanë vendosur sanksione të ashpra ndaj Moskës.
Discussion about this post