Ndihmës Sekretarja për Byronë e Çështjeve Evropiane dhe Euroaziatike Dr. Karen Donfried do të udhëtojë në Ballkanin Perëndimor, ku ditën e sotme pritet të vijë në Shqipëri në kuadër të 100 vjetorit të marrëdhënieve diplomatike SHBA-Shqipëri.
Karen Donfried do të zhvillojë një takim me kryetarin e grupit Parlamentar të PD-së, Enkelejd Alibeaj, ku e pranishme do të jetë edhe ambasadorja e SHBA në Tiranë, Yuri Kim.
Takim pritet të zhvillohet në zyrën e Kuvendit të premten rreth orës 10:30, dhe do të jenë të pranishëm edhe Jorida Tabaku dhe anëtarë të tjerë të grupit parlamentar, jo anëtarë të Komisionit të Rithemelimit, duke injoruar ish-kryeministrin Berisha.
Ndërkohë që mesditën e së premtes është parashikuar një takim edhe me kryeministrin Rama rreth orës 12:00. Ky është takimi i dytë që Yuri Kim zhvillon me Alibeajn në një kohë shumë të shkurtër. Ndërkohë kujtojmë se së fundmi janë shtuar përplasjet mes ish-kryeministrit Sali Berisha dhe ambasadores amerikane me akuza se kjo e fundit po ndikon në procesin e Gjykatës lidhur me drejtimin e PD-së.
Discussion about this post