Deputeti i Partisë Demokratike Edi Paloka ka kujtuar ditën e sotme zgjedhjet e datës 25 prill që u zhvilluan një ditë më parë. Në një postim të bërë në rrjetin e tij social Facebook, Paloka ka shkruar se ishte aleanca mes ish-kreut të Partisë Demokratike, Lulzim Basha, kryeministrit Edi Rama dhe ambasadores së Shteteve të Bashkuara të Amerikës Yuri Kim, të cilët i përmend vetëm me iniciale, që solli një masakër elektorale.
Gjithsesi, Paloka shton se PD-ja nuk dorëzohet dhe se do t’ia dalë të ribashkohet e kthejë pluralizmin në vend.
“Një vit më parë Rama përmbylli masakrën elektorale dhe grabiti mandatin e tretë. Pas një viti, në vend që të ishim në betejë për vendosjen e drejtësisë, rrëzimin e Ramës dhe rikthimin e demokracisë në vend, falë L.B, E.R dhe Y.K jemi në përpjekje për të ribashkuar PD dhe për të shpëtuar pluralizmin në Shqipëri.”
Së fundmi, Paloka e ka mbyllur shkrimin e tij duke thënë se nuk është hera e parë që janë vënë përballë sfidave të tilla, por sipas tij ata nuk do e humbasin besimin dhe në fund do të triumfojmë mbi të keqen.
“Nuk është hera e parë që vihemi përballë sfidave të tilla. Po dhe këtë herë do ia dalim, siç ia kemi dalë dhe në situata më të vështira e në fund do të triumfojmë mbi të keqen.”
Discussion about this post