Edi Rama ka mbajtur pasditen e sotme një takim me njësitë 5,6, 13 dhe 14 të PS-së në Tiranë, ku gjatë fjalës së tij, deklaroi se nuk e mohon që ka probleme me Kadastrën.
Por, edhe pse ka 12 vite në pushtet, Rama kërkoi sërish voton që t’i zgjidhë këto probleme me çështjet e pronësisë, me paragjykimin se ato nuk mund t’i zgjidhë “këneta”, duke iu referuar opozitës.
“Nuk e kam si ta mohoj që kemi problem me hipotekën. Pyetja është, ky problem është arsye për ta votuar PS, apo jo? Nuk do mend. Nëse nuk voton PS, nuk ka shans që në këto dy vite e pak të mbetura për të plotësuar transformimin e kadastrës nga A te ZH-ja ta bëjnë të ‘Mos o Zotshmit’. Kush do e bëjë Këneta? Nuk mund ta humbi Shqipëria këtë moment.” – tha Rama.
Gjithashtu, Rama theksoi edhe një herë se Amerika i ka tërhequr “ushtarët” që mbështesnin SPAK-un, dhe se stafetën tashmë e mban ai dhe se Berisha nuk mund ta shkrijë.
“Ka gjëra që nuk shkojnë, por ama, duke filluar nga kjo e korrupsionit, që është më e tmerrshmja. Është më e tmerrshmja që ne ta pranojmë pa luftë. Që të na kërkojnë ne hesap të tjerët. Ne duhet t’i kërkojmë hesap njëri-tjetrit. Askush jashtë kësaj partie nuk na kërkon dot hesap për luftën ndaj korrupsionit. Çfarë po ndodh këtu, nuk jemi ne viktima. Nuk është një luftë që na e hapi Amerika, se Amerika i tërhoqi ushtarët që kishte sjellë për të ndihmuar dhe mbështetur SPAK, ikën. Kush e mban stafetën tani? E keni dëgjuar bufin e kënetës që thotë do ta shkrijmë? Nëse ne do ishim ata që përpiqen të na pikturojnë, ishte shkrirë SPAK sot. Një fishkëllimë bufit dhe e di si vinte me ato flokët sikur sapo ka zbritur nga motori, me zhaba, zhapiqe, me gjithë ushtrinë nga mbrapa për të shkrirë SPAK. Por nuk ndodh kjo sepse e kemi sjellë ne këtë punë deri këtu.” – tha Rama.
Discussion about this post