169km/h në autostradë, katër shoferë në pranga

Policia Rrugore ka arrestuar katër shoferë, ndërsa ka gjobitur disa të tjerë për mosrespektim të rregullave të qarkullimit rrugor.

Sipas njoftimit, gjatë kontrollit në aksin Farkë-TEG e Sauk-TEG, u konstatuan 18 raste të shpejtësisë tej normave të lejuara, që varionin 131 km/h deri në 169 km/h. Drejtuesve të automjeteve iu pezullua leja e drejtimit nga 2 muaj deri në 10 muaj, pasi disa prej tyre ishin shkelës të disa rregullave të ndryshme të qarkullimit rrugor.

Gjithashtu, u konstatuan dhe 30 raste me shpejtësi nga 118 km/h deri në 127 km/h, ku shoferët u ndëshkuan me masë administrative 2.000 lekë deri në 4.000 lekë të rinj secili.

Nga monitorimi me alkooltestues, janë arrestuar në kushtet e flagrancës katër drejtues mjetesh, në gjendje të dehur. Gjithashtu, janë pezulluar 12 leje drejtimi, për drejtim mjeti nën efektin e alkoolit, si dhe janë vendosur 15 masa administrative me vlerë nga 5.000 lekë deri në 15.000 lekë të rinj, për drejtim mjeti nën ndikimin e alkoolit.