Gerti Shehu, personi që qëlloi me grusht Sali Berishën në nisje të protestës së 6 dhjetorit, ka kërkuar që të mos ndiqen penalisht truprojat e kreut të Partisë Demokratike që e dhunuan pas sulmit që i bëri kryedemokratit.
Ata rrezikonin të merreshin nën hetim për plagosje të lehtë me dashje ose dëmtime të tjera me dashje, pasi 31-vjeçari ende ndodhet në spitalin e Traumës për shkak të goditjeve të marra. Por Shehu duket se ka vendosur që të mos i kallëzojë penalisht.
Lexo edhe: “Mjeku i dha kurën”, flet avokati i Gert Shehut
Gert Shehu sulmoi Berishën me grusht në fytyrë pak para se të niste protesta ditën e martë. Berisha u sulmua papritur nga 31-vjeçari, teksa po ecte nga selia e partisë së bashku me ish presidentin Ilir Meta, në drejtim të shëtitores “Dëshmorët e Kombit”, ndërkohë që në Tiranë po mbahej Samiti BE-Ballkani Perëndimor.
Sipas Berishës, 31-vjeçari Shehu është “agjent i policisë kriminale”, ndërsa sipas policisë, 31-vjeçari është person me precedentë kriminalë dhe me çrregullime të shëndetit mendor.
Prokuroria ka administruar gjithashtu kartelën mjekësore të Shehut për të parë të gjithë historikun shëndetësore të të riut. Priten edhe konkluzionet e një ekspertimi mental për të verifikuar gjendjen e shëndetit mendor të autorit të sulmit apo nëse ka qenë nën efektin e narkotikëve.
Discussion about this post