Një i ri është shpallur në kërkim nga Policia në Memaliaj, pasi dyshohet se kishte fshehur në banesën e një shtetaseje të moshuar me probleme të shëndetit mendor, dy armë zjarri kallashnikovë, për llogari të një grupi kriminal.
Në kuadër të operacionit policor të koduar “Parandalimi” është shpallur në kërkim shtetasi S. Q., 20 vjeç, banues në Memaliaj, teksa rasti në fjalë është goditur, pas një hetimi dymujor.
“Në Memaliaj, gjatë kontrollit në banesën e 72-vjeçares që e kishte në përdorim, në një dhomë që shërbente si magazinë, shërbimet e Policisë kanë gjetur brenda një çante sportive, 2 armë zjarri kallashnikov. Nga hetimet dyshohet se armët janë fshehur në këtë banesë, nga shtetasi S. Q.” – njofton Policia.
Autoritetet thonë se armët e zjarrit do të dërgohen në Institutin e Policisë Shkencore, për ekspertizë, nëse janë përdorur në ngjarje kriminale.
Gjithashtu, Policia thotë se në drejtimin e Prokurorisë, vijojnë hetimet për rastin dhe për identifikimin e shtetasve të tjerë të përfshirë.
Materialet procedurale i kanë kaluar Prokurorisë së Gjirokastrës për veprime të mëtejshme hetimore, për veprën penale “Mbajtja pa leje dhe prodhimi i armëve, armëve shpërthyese dhe i municionit”.
Discussion about this post