23 vjet nga masakra e Mejës, 376 djem dhe burra të ekzekutuar nga terrori serb

Sot është përvjetori i 23-të i masakrës në Mejë të Gjakovës ku në 27 prill 1999 u ekzekutuan 376 persona.

Në përkujtim të ngjarjes tragjike, Komisioni Qeveritar për Persona të Zhdukur vendos kurora lulesh para përmendores së personave të pagjetur sheshi “Skënderbe” në Prishtinë, në orën 09:00. Kryetari i Kuvendit të Kosovës, Glauk Konjufca, bën homazhe pranë Obeliskut të të zhdukurve tek Kuvendi, në orën 9:00 dhe Mejë të Gjakovës në orën 11:00.

Kryetari i LDK-së, Lumir Abdixhiku bën homazhe te Kompleksi Memorial “Lëndina e pikëllimit”, në ora 10:30. Komisioni Qeveritar për Persona të Zhdukur në bashkëpunim me Këshillin Koordinues të Asociacioneve Familjare të të Zhdukurve të Kosovës, bëjnë homazhe te Kompleksi Memorial në Meje, në ora 11:00.

Ndërkohë Lëvizja Vetëvendosje do të mbjellë fidanë në kujtim dhe nderim të 1617 personave të pagjetur nga lufta e fundit, te Biblioteka Kombëtare në Prishtinë, ora 14:00. 23 vjet më parë, forcat serbe rrethuan Rekën e Keqe dhe Lugun e Carragojës në rrethinën e Gjakovës. Brenda disa orëve u krye ekzekutimi më i egër dhe masakra më e madhe në luftën e Kosovës gjatë viteve 1998-1999.

Nga operacioni i planifikuar u ndërprenë të gjitha rrugët duke lënë të lira vetëm dy rrugë në drejtim të Mejës. Grumbullimi i djemve dhe burrave në grupe nga mosha 15-60 vjeç filloi në orët e para të mëngjesit. U goditën 15 fshatra të rrethit të Gjakovës, duke i ekzekutuar të gjithë djemtë dhe burrat derë më derë.

Uhtria serbe, policia, beretat e kuqe, paramilitarët, fqinjët e maskuar krijuan vargun me imazhet e Srebrenicës duke ekzekutuar 376 meshkuj shqiptarë në atë që njihet si dita e festës e ish-Jugosllavisë e cila nën vallen e gjakut ishte krijuar me lojërat e juristëve të Sllobodan Millosheviçit më 27 prill 1992.

Atë ditë asnjëri nga të ndaluarit nuk arriti të shp[ëtonte nga Meja dhe pas luftës trupat e masakruar të tyre, disa u gjetën nëpër varreza masive nëpër Kosovë kurse të tjerët ka informacion se janë ende diku nëpër Serbi.

Përkundër kërkesave të familjarëve dhe organizatave të ndryshme në Kosovë që trupat e tyre të kthehen nga Serbia, kjo gjë është zvarritur nga shteti serb dhe ende nuk është bërë deri më sot.