Kryetarja e LSI-së, Monika Kryemadhi ka pritur në një takim zyrtar kreu e Prezencës së OSBE në Shqipëri, ambasadorin Vincenzo Del Monaco.
Kryemadhi shkruan në Facebook se ka informuar ambasadorin se zgjedhjet e 25 prillit, dëshmuan që politika shqiptare ende nuk ka dhënë zgjidhje të plotë për zgjedhje të lira e të ndershme.
“Mirëprita me kënaqësi ditën e sotme Kreun e Prezencës së OSBE në Shqipëri, Ambasador Vincenzo Del Monaco. Duke e falenderuar për rolin pozitiv të misionit për reformat që vendi ka ndërmarrë lidhur me shtetin e së drejtës, i nënvizova nevojat që Shqipëria ka për përmirësim të vazhdueshëm, drejt një demokracie funksionale, që garanton të drejtat e njeriut dhe biznesit”, shkruan Kryemadhi.
Kryemadhi shton se është e nevojshme një reformë e plotë dhe një ligj zgjedhor që mundëson barazinë e votës dhe kthen pushtetin në duart e qytetarëve.
“Masakra e 25 Prillit dëshmoi se politika shqiptare nuk ka dhënë ende një zgjidhje të plotë e afatgjatë për zgjedhje të lira e të ndershme, ndaj ne do të mbetemi të angazhuar për një reformë më të plotë, për një sistem dhe ligj zgjedhor që mundëson barazinë e votës dhe e kthen pushtetin vërtetë në duart e sovranit”, shprehet ajo.
Discussion about this post