Ministria e Mbrojtjes ka përditësuar situatën e zjarreve në vend, duke njoftuar se gjatë 24 orëve të fundit janë raportuar 25 vatra zjarri në të gjithë vendin. Nga këto, 4 vatra vijojnë të jenë aktive në orët e para të ditës së sotme.
Vatrat e zjarrit aktive janë evidentuar në bashkitë e Vlorës, Poliçanit, Bulqizës dhe Dibrës:
- Vlorë: Në vendin e quajtur “Sotiran”, mes fshatrave Tragjas dhe Dukat, zjarri në një sipërfaqe me shkurre dhe ferra në lartësi të malit mbahet në monitorim. Gjatë ditës së sotme në zonë po operojnë 8 forca zjarrfikëse dhe 7 punonjës nga Shërbimi Pyjor. Një helikopter Cougar i Forcës Ajrore u angazhua dje në ndihmë të forcave tokësore.
- Poliçan: Vatra në fshatin Zgërbonjë, në njësinë administrative Vërtop, vijon të jetë në monitorim dhe nuk paraqet rrezik për përhapje të mëtejshme.
- Bulqizë: Në vendin e quajtur “Livadhi i Peladhisë”, në njësinë administrative Zerqan, ka vijuar puna për shuarjen e zjarrit në një sipërfaqe pyjore me pisha dhe dëllinjanë. Terreni i vështirë kërkon mjete me kalueshmëri të lartë.
- Dibër: Në vendin e quajtur “Liqeni i Luleve”, pjesë e Parkut Kombëtar Lurë, në njësinë administrative Lurë, zjarri nuk arriti të izolohej plotësisht pavarësisht punës së forcave operacionale deri në orët e vona. Gjatë ditës së sotme janë angazhuar 7 efektivë zjarrfikës, 6 forca të AdZM-së, 5 forca bashkiake dhe 25 vullnetarë. Në mbështetje të tyre, sot do të operojë edhe helikopteri i Forcës Ajrore.
Ministria e Mbrojtjes njofton gjithashtu se në dy raste zjarret janë evidentuar në banesa dhe një në një godinë biznesi, duke shkaktuar dëme të konsiderueshme materiale.
Si pasojë e zjarreve të rëna kryesisht në sipërfaqe me pemë, shkurre e barishte, janë djegur rreth 5 hektarë me bimësi. Në operacionet e shuarjes u angazhuan 30 automjete zjarrfikëse dhe 351 forca. Forcat e Armatosura kontribuan me 59 efektivë, 1 helikopter, 5 automjete zjarrfikëse, 1 pompë thithëse, 2 mjete vetëshkarkuese dhe 1 traktor me zinxhirë.
Bazuar në parashikimet e Institutit të Gjeoshkencave, sot pritet nivel rrezik “I LARTË” në pothuajse të gjitha qarqet. Në qarkun e Shkodrës priten reshje të dobëta deri lokalisht mesatare, në formë shtrëngate.
I gjithë sistemi i mbrojtjes civile vijon të monitorojë situatën dhe është në gatishmëri të plotë për ndërhyrje të shpejtë. Ministria u bën thirrje qytetarëve të tregojnë përgjegjësi maksimale për të shmangur çdo veprim që mund të shkaktojë zjarr dhe të njoftojnë menjëherë autoritetet vendore në rast zjarri.
Discussion about this post