Punonjëset e një fasonerie në Shkodër kanë dalë ditën e sotme në protestë, për shkak se nuk kanë marrë rrogat që prej 3 muajsh. Pronari i rrobaqepësisë me 13 shtator ka mbyllur biznesin duke hapur një tjetër, por pa paguar punonjësit për punën e tyre. Për këtë arsye, ato kanë dalë në protestë dhe shprehen se nuk kanë marrë as rroga, madje nuk kanë bërë asnjë ditë pushim që nga korriku. “Ne kemi punuar dhe nuk jemi paguar, madje nuk kemi marrë as ditët e pushimit që na takojnë me ligj dhe nuk janë paguar as sigurimet shoqërore e shëndetësore”, është shprehur një punonjëse.
Një tjetër punonjëse tregoi se kanë depozituar kallëzim në prokurori, por akoma nuk kanë marrë një përgjigje. Ajo tha për mediet që kërkojnë drejtësi se më ato të ardhura sigurojnë ushqimet për familjet e tyre. “Kërkojmë vetëm paratë tona që na takojnë, nuk duam asgjë tjetër”, ka thënë ajo.
Nga ana tjetër pronari jo vetëm që nuk ka pranuar ta zgjidh këtë problem, por ka thënë se nuk do të marrin asnjë pagë për shkak se kanë bërë kallëzim ndaj tij. Nga ky ngërç preken 330 familjare, të cilat shprehen se nuk po sigurojnë dot as bukën e gojës.
Discussion about this post