Kryetari i Partisë së Lirisë, Ilir Meta, ka kujtuar 31 vjetorin e eksodit të 8 gushtit të vitit 1991, kur mbi 20 mijë shqiptarë në bordin e anijes “Vlora” u larguan drejt Italisë për një jetë më të mirë. Përmes një postimi në Facebok, ai shprehet se shpopullimi në dy vitet e fundit regjistrohet në të njëjtat nivele si në ’91, prandaj ka ardhur koha që ta parandalojmë para se të gjithë qytetarët të braktisin vendin. Meta tha se, për t’i dhënë fund kësaj drame duhej ndëshkuar kapja e shtetit dhe modeli korruptiv që ka varfëruar shqiptarët.
“Pas 31 viteve nga këto pamje tronditëse dhe emocionuese të 8 gushtit 1991, kur rreth 20 mijë shqiptarë në bordin e anijes “Vlora” nisën udhëtimin drejt lirisë, për një jetë të re dhe një të ardhme më të mirë, eksodi i shqiptarëve vijon dhimbshëm. Edhe sot, 40 përqind e emigrantëve të paligjshëm që kalojnë La Manshin, duke rrezikuar jetën e tyre, janë shqiptarë. Që drama e madhe e shpopullimit të marrë fund dhe shqiptarët të ankorojnë shpresën në Atdheun e tyre, duhet ndëshkuar kapja e shtetit, modeli korruptiv dhe kriminal që lë në varfëri shumicën e qytetarëve, për të pasuruar një pakicë. Europa do ndërtohet në Shqipëri kur sovrani të marrë në dorë fatet e veta”, shkruan ai, Ndërsa shprehet se vendi mund të shpëtojë nga kriminelët vetëm me referendum.
Discussion about this post