Sot përkujtohet 33-vjetori i rënies së monumentit të diktatorit komunist Enver Hoxha, më 20 shkurt të vitit 1991
Më 20 shkurt të vitit 1991, mijëra studentë e qytetarë u ngritën për të shembur simbolin e komunizmit, monumentin e diktatorit Enver Hoxha, i cili ishte i vendosur në qendër të Tiranës.
Më 18 shkurt 1991, studentë të Universitetit të Tiranës, që në atë kohë mbante emrin e diktatorit Enver Hoxha, hynë në grevë urie.
Në 20 shkurt të vitit 1991, pas protestave disa javore të studentëve të dhjetorit dhe ditët e fundit me grevë urie, qytetarët e Tiranës u bashkuan në një protestë madhështore, e cila u finalizua me rrëzimin e monumentit të diktatorit Enver Hoxha.
Data 20 shkurt e vitit 1991 shënoi fundin e regjimit komunist në Shqipëri.
Po sot opozita do të zhvillojë një protestë që do të nisë në orën 17:30, para Kryeministrisë, në Bulevardin ‘Dëshmorët e Kombit’, por këtë herë për të protestuar kundër qeverisë ‘Rama’ Kjo është tubimi i parë i një përmase të tillë, ku kryedemokrati Sali Berisha nuk do të jetë prezent fizikisht për shkak të masës ‘arrest shtëpiak’.
Edhe pse jo fizikisht, lideri i demokratëve mesazhin e tij për protestuesit do ta japë përmes teknologjisë, duke mbajtur një fjalim nga dritarja e banesës së tij, që do të transmetohet në një ekran, i cili do të vendoset përpara selisë së Kryeministrisë.
“Sali Berisha e ka thirrur këtë protestë dhe sigurisht ai do ta drejtojë këtë protestë”, tha Flamur Noka. Pavarësisht se nga drejtuesit e lartë të selisë blu është folur për një protestë paqësore, në të cilën janë ftuar qytetarët që të vijnë me fëmijët, sekretari i përgjithshëm i Partisë Demokratike, Flamur Noka, thotë se askush nuk mund të dirigjojë revoltën e qytetarëve.
Ndërsa sot protestuesit do të mblidhen para kryeministrisë, kreu i qeverisë Edi Rama do ta ndjekë atë nga Turqia, ku do të takohet me presidentin turk, Rexhep Taip Erdogan.
Kjo protestë ka vënë në gatishmëri Policinë e Shtetit. Mësohet se mbi 1100 forca të policisë, duke nisur nga ato të rendit, FNSH, Shqiponjat dhe Garda e Republikës, do të jenë në terren për mbarëvajtjen e protestës.
Në gatishmëri do të jenë edhe forcat RENEA. Do të ketë edhe autobotë me ujë nëse do të ketë nevojë në raste incidentesh. Si në çdo protestë do të krijohet kordoni me efektivë policie para kryeministrisë dhe perimetrit rreth saj.
Dyert e kryeministrisë do të jenë të blinduara me veshje metalike.
Të vetmit që nuk do t’i bashkohen tubimit kundër kryeministrit Rama janë Lulzim Basha dhe deputetët që e mbështesin atë.
Discussion about this post