Kryetari i Partisë Demokratike, Sali Berisha mori pjesë në aktivitetin e zhvilluar nga të rinjtë demokratë, me rastin e 8 dhjetorit, Ditës së Rinisë.
Në fjalën e tij, ish-kryeministri kujtoi disa momente nga 8 dhjetori i vitit 1990, ndërsa u ndal tek regjimi i asaj kohe, që sipas tij vriste të rinj çdo javë.
Berisha hodhi akuza ndaj qeverisë së Edi Ramës.
Ai e cilësoi regjimin e Ramës si një diktaturë që ka ndërtuar me pabesi të plotë narkoshtetin e vetëm në Europë.
Për zgjedhjet 2025, Berisha siguroi të rinjtë që do të kenë fitore të sigurtë që më në fund të pastrojnë vendin nga e keqja.
Pjesë nga fjala
Mirënjohjen më të thellë ndaj jush që, keni ardhur sot këtu për të nderuar veprën e pavdekshme të studentëve liberatorë dhe tribunit legjendar të tyre, Azem Hajdari, më 8 dhjetor të vitit 1990.
Miqtë e mi, ne kemi patur një histori të dhimbshme dhe të vështirë. Në vitin 1912, u shpall pavarësia e kombit dhe liria e tij. Në vitin 1944, më 28 tetor, populli ynë u çlirua nga një pushtim i jashtëm, për të rënë po atë ditë me nnjë pushtim të brendshëm barbar, më mizorin që kohërat kanë njohur në diktaturën staliniste të Enver Hoxhës.
Kjo diktaturë, në 46 vite të ekzistencës së saj vendosi mbi shqiptarët shtypjen më të egër që ata kishin njohur në tërë historinë. Vendosi diktaturën më të thellë të izolimit të tyre, sa kurrë ndonjëherë në histori. Vendosi tiraninë e urisë dhe skamjes që, shqiptarët s’e kishin njohur kurrë më parë nëpërmjet hiperkolektivizmit.
Rënia e murit të Berlinit dhe revolucionet demokratike të vitit 1989, pavarësisht prej tyre, Shqipëria mbetej siç e cilësonte partia staliniste dhe diktatori i fundi, si bastioni ose kështjella buzë Adriatikut e socializmit.
Regjimi, me propagandën e tij, fliste çdo ditë për demokratizimin, por vriste çdo javë të rinjtë, të cilët niseshin për të kaluar në botën e lirë. Dhe jo vetëm i ekzekutonte, por i sillte dhe i zvarriste kufomat e tyre në qytetet: Shkodër, Gjirokastër, Sarandë, Korçë, vetëm e vetëm për të terrorizuar popullatën.
Pikërisht, në këto rrethana, 34 vite më parë, një grup studentësh dalin në darkë në këtë shesh dhe nisin protestën e parë studentore në historinë e vendit. Rreshtojnë një seri kërkesash.
Po regjimi, pavarësisht se ata nuk ishin shumë, atë natë ishin ndofta jo më shumë se sa jeni ju këtu sot, nuk e ka jetën e gjatë ashtu siç nuk do e ketë edhe regjimi i Edi Ramës.
Studiuesit më të mëdhenj të diktaturave e kanë quajtur këtë diktaturë më të rrezikshme. Shqipëria sot po jeton një diktaturë, në të cilën të gjitha pushtetet janë në dorë të një njeriu, të një antishqiptari. Një diktaturë, e cila zgjedhjet i ka shndërruar në një fasadë, një diktaturë e cila ka rikthyer në Shqipëri burgjet dhe arrestimet politike. Në zgjedhjet e 11 majit shkojmë të sigurt, pasi do pastrojmë shtëpinë tonë. Maskat ranë, ndaj kërkohet sulm. Le të ngrihemi në lartësinë e atyre që shembën diktaturën”, tha Berisha
Discussion about this post