Pak kohë më parë qeveria mori vendimin që bizneset në vend ta sigurojnë vetë energjinë në treg të lirë dhe kjo po kthehet në një barrë të rëndë për ta. Sipas të dhënave të publikuara nga Enti Rregullator i Energjisë bizneset po përballen me çmime tejet të larta për sigurimin e energjisë. Për muajin nëntor ky çmim arriti në 38.73 lekë/kwh, disa fish më i lartë se muajt e parë të vitit 2021. Më konkretisht deri në muajin qershor çmimi i energjisë për këtë kategori arrinte mesatarisht në 10.5 lekë/kwh, çka do të thotë se në muajin nëntor ai ishte gati 4 herë më i lartë.
Më tutje theksohet se, tendenca në rritje e çmimeve ka nisur që prej muajit korrik, për të arritur rekordin në muajin nëntor të vitit që sapo lamë pas. Kjo rritje vjen si pasojë e çmimit të lartë, me të cilin blihet energjia në tregun e parregulluar, duke qenë se është një prej elementëve përbërës të formulës me të cilën llogaritje çmimi i shitjes së energjisë elektrike të furnizuar nga Furnizuesi i Mundësisë së Fundit.
Por, pikërisht për shkak të situatës me çmimet e larta, në ditët e fundit të muajit Ministria e Infrastrukturës dhe Energjisë njoftoi një shtyrje të këtij detyrimi edhe me 6 muaj, ndonëse procesi shtyhet prej vitesh.
Discussion about this post