Një 43-vjeçar shqiptar është dënuar me burgim të përjetshëm nga një gjykatë në Gjermani, pasi u shpall fajtor për vrasjen e një bashkëvuajtësi brenda burgut të Straubingut.
Krimi ndodhi në fund të vitit 2024, ndërsa viktima ndërroi jetë në fillim të vitit 2026 pas më shumë se një viti në gjendje kome.
Sipas vendimit të gjykatës, shqiptari hyri në qelinë e të burgosurit sapo u hapën qelitë në mëngjes, mbylli derën pas vetes dhe e sulmoi me grushte.
Viktima u rrëzua, duke goditur kokën në radiator, ndërsa autori vijoi ta godiste me të paktën dy shqelma në kokë përpara se të largohej.
Rreth tre minuta më vonë, një tjetër i burgosur e gjeti të plagosurin rëndë dhe ai u transportua në spital, ku ra në koma pa u zgjuar më.
Sipas prokurorisë gjermane, motivi i krimit ishte një borxh i lidhur me një tatuazh që viktima i kishte bërë autorit, për të cilin ky i fundit nuk kishte paguar ende.
Gjykata e shpalli 43-vjeçarin fajtor për vrasje të kryer për përfitim material dhe theksoi rëndësinë e veçantë të fajësisë së tij, çka e bën më të vështirë lirimin e parakohshëm.
Vendimi nuk ka marrë ende formë të prerë.
Shqiptari po vuante tashmë një dënim të përjetshëm për tentativë vrasjeje, pasi në vitin 2021 kishte sulmuar ish-partneren e tij me disa goditje me thikë, me qëllim vrasjen e saj.
Discussion about this post