64-vjeçari në pranga për ngacmimin e së miturës, e ëma: E kërcënonte se do i vriste babanë

Një 64-vjeçar është arrestuar nga policia e Devollit pasi akuzohet se ka ngacmuar seksualisht një vajzë të mitur.

Burime zyrtare nga policia bënë me dije këtë të enjte se në pranga u vu Z.R., 64 vjeç, banues në fshatin Hoçisht, pas kallëzimit të vajzës 13 vjeçe.

“Komisariati i Policisë Devoll ndaloi me iniciativë shtetasin Z. R., 64 vjeç, banues në fshatin Hoçisht, Devoll, pasi dyshohet se ka ngacmuar seksualisht një 13-vjeçare, deklarimet e së cilës u morën në prani të prindërve dhe të psikologes”, njoftoi policia.

Dëshmitë

Në dëshmitë e dhëna për policinë, nëna dhe gjyshi i vajzës së mitur thanë se vajza kërcënohej nga 64-vjeçari, i cili komunikonte me të miturën përmes një telefoni celular që familjarët i kishin lënë në përdorim kësaj të fundit.

Po ashtu, sipas tyre, ai e manipulonte 13-vjeçaren duke i ofruar para.

“Siç më tregoi vajza, kohë më parë e kishte kërcënuar dhe i kishte thënë që po të tregonte për ngacmimet do ti vriste babanë”, mësohet të ketë thënë e ëma e 13-vjeçares për uniformat blu.

“Ja ka thënë muaj më përpara. Vajza më tha që ‘atë që mendoni ju nuk ka ndodhur. S’më ka bërë gjë, më ka bërë gjëra të tjera. Më ka prekur me dorë’. E njohim si bashkëfshatar, nuk kishim hyrje dalje. Ka 2 ditë vajza që më tregoi pasi kapëm mesazhet që ai dërgonte në telefonin e gjyshit. Ne e pame kur i ra telefoni para 2-3 ditësh, e pa kunata por nuk tregoi se kishte burrin atje. I ra 2 herë në tel, por ne nuk folëm. E merrte jashtë fshatit vajzën, e gënjente, i jepte lek”, shtoi ajo.

Gjyshi i vajzës tregoi se mbesa dhe 64-vjeçari komunikonin me mesazhe, ndërsa shtoi se i arrestuari është dënuar për vrasje në kohën e sistemit komunist.

“Gruan e kam në Gjermani dhe më ka lënë telefonin dhe e përdor ime mbesë. Ja kërkova një ditë dhe s’donte të ma jepte, ja mora me forcë dhe nusja e djalit tjetër lexoi mesazhet. Mesazhet ishin ‘dil këtu, takohemi atje’, vende që i kishin frekuentuar. Mesazhe kërcënuese s’kishte. Ne dje ja kapëm. Doja ta takoja atë personin, nuk ishte, dhe takova një punonjës policie dhe bëra denoncim. Është person problematik, ka qenë i dënuar në kohën e komunizmit për vrasje, ka bërë gati 18 vite burg, dhe i dënuar për përdhunim të një gruaje”, mësohet të jetë shprehur ai.

Disa ditë më parë, në Golem të Kavajës u arrestua një 48-vjeçar nën dyshimet se ka përdhunuar për 4 vite vajzën e tij të mitur.