Gjatë këtij viti më shumë se 6.500 njerëz kanë kaluar në mënyrë joligjore kufirin mes Turqisë dhe Bullgarisë. Shifra është trefish më e lartë se periudha e njëjtë e vitit 2020. Për këtë arsye, ditën e sotme Bullgaria ka dërguar rreth 350 ushtarë në kufi me Turqinë, për të ndihmuar forcat policore që të përballen me fluksin në rritje të emigrantëve, njoftoi ministri i Mbrojtjes i Bullgarisë, Georgi Panajotov.
“Ushtarët arritën sot në kufirin bullgaro-turk për të mbështetur policinë kufitare”, tha ai në një deklaratë për mediet.Bullgaria ndodhet në kufirin e jashtëm tokësor të Bashkimit Evropian (BE), në rrugën për emigrantët dhe refugjatët që duan të arrijnë në Evropë. Një tel me gjemba, i dëmtuar në shumë vende, mbulon kufirin bullgaro-turk 259 km të gjatë.
Parlamenti kishte vendosur në gusht të dërgonte 400 deri në 700 trupa në kufijtë e Bullgarisë me Turqinë dhe Greqinë për të ndihmuar në ndërtimin e gardheve. Anëtari më i varfër i BE-së, Bullgaria, nuk ka pranuar asnjëherë një numër të madh azilkërkuesish, shumica e të cilëve largohen nga vendi edhe para se të marrin një përgjigje për statusin e tyre të refugjatit. Ndërkohë mediet e huaja bëjnë me dije se, Bullgaria është shteti më i varfër anëtar i Bashkimit Evropian prandaj emigrantët nuk synojnë të ndalen aty, por të kalojnë në vendet tjera të pasura të BE-së.
Bullgaria është një nga rrugët kryesore të cilën emigrantët nga Lindja e Mesme e shfrytëzojnë për të hyrë në Bashkimin Evropian. Bullgaria ka ndërtuar një gardh me gjemba në kufirin me Turqinë, por ai është pjesërisht i dëmtuar.
