Kryeministri Edi Rama e ka nisur këtë javë me një postim në Facebook, ku dhe njëherë tjetër përmend 7 pikat e rezistencës sociale që sipas tij do të mbrojnë shtresat që preken nga rritja çmimeve, por nuk nënkuptojnë në asnjë moment uljen e tyre.
“Mirëmëngjes, dhe me 7 masat e Paketës së Rezistencës Sociale, të cilat flasin vetë, edhe këtë herë, se kjo është qeveria që kurrë nuk i lë vetëm në ditët e vështira ata që kanë nevojë për mbrojtje, ju uroj një javë me më pak stres nga pasojat e padëshiruara të një lufte që as e nisëm, as e ndalim dot ne, por që do ta përballojmë patjetër me forcën e karakterit dhe të solidaritetit tonë me njëri-tjetrin”, shkruan Rama në postimin e tij në rrjetet sociale.
Më shumë se sa për mbrojten e konsumatorëve, këto pika shihen si mjet propagande për të ulur ritmin e protestave që prej disa ditësh kanë përfshirë të gjithë vendin.
Edhe sot në orën 17:00 është thirrur një protestë tjetër përpara Kryeministrisë, ku kujtojmë se fillimisht këto protesta nisën kundër çmimit të naftës që arriti shifra rekord në 260 lekë për litër dhe më pas kundër rritjes së çmimit dhe për produktet e tjera. Kujtojmë se kjo ditë përkon dhe me koncertin e Malumës, pak metra më tutje, kostoja e të cilit përllogaritet 600 mijë euro.
Discussion about this post