Demokratët përkujtojnë sot 8 dhjetorin, që ndryshe njihet dhe si Dita e Rinisë në Shqipëri. Liderët e PD-së ndër vite këtë datë e kujtojnë me takime në Qytet Studenti, vendi ku studentët u ngritën të bashkuar duke zhvilluar protesta që sollën pluralizmin, dhe rënien e regjimit komunist që prej 46 vjetësh kishte mbizotëruar në Shqipëri.
Ndryshe nga vitet e tjera, Berisha dhe Basha do të zhvillojnë dy ceremoni të ndara nga njëra tjetra, duke marrë shkas dhe nga zhvillimet e fundit politike në PD që nisën me përjashtimin e Berishës nga grupi parlamentar pas shpalljes non-grata nga SHBA.
Mësohet se, kryetari aktual Lulzim Basha do të zhvillojë një takim me të rinjtë në ambientet e ArTurbinës, ndërsa ish-kryeministri Sali Berisha ka bërë me dije se një orë më pas do të jetë në Qytet Studenti ku do të zhvillojë takim dhe homazhe tek shtatorja e Azem Hajdarit.
Dita e sotme shënon 31 vjet nga ngjarjet e dhjetorit 1990, që shënjuan për herë të parë tronditjen e regjimit komunist. Natën e 8 dhjetorit 1990, rreth 300 studentë nisën atë që më vonë u quajt Lëvizja Studentore ‘90. Të organizuar ata marshuan nga Qyteti Studenti drejt qendrës së Tiranës. Ata u bënë iniciatorë të kthesës së madhe historike të vendit, duke u ngritur në protesta që sollën rënien e sistemit komunist dhe ardhjen e demokracisë.
Me shprehjen “E duam Shqipërinë si gjithë Europa”, të rinjtë kërkuan ngritjen e sistemit të vlerave perëndimore dhe të shtetit të së drejtës; integrimin në Europë dhe garantimin e pluralizmit politik si bazë kryesore për një shoqëri të lirë e demokratike.
Akti i tyre publik, sa qytetar aq edhe politik, i dha fund në mënyrë paqësore epokës të gjatë të vetëizolimit dhe të sundimit ideologjik, duke i hapur kështu rrugën e ekonomisë së tregut dhe shoqërisë së hapur.
Discussion about this post