Kanë dalë sërish në protestë përfaqësuesit e bizneseve dhe banorë të zonës së Sukthit, kundër aksionit të ARRSH për mbylljen e kalimeve të rrezikshme drejt hyrjes dhe daljes nga autostrada.
Protesta është zhvilluar pranë zonës ku ARRSH po hap kanalet buzë rrugës për të penguar hyrjen dhe daljen e automjeteve. Alban Isteri, kryetari i dhomës së tregtisë dhe industrisë në Durrës, shprehet se ky vendim penalizon rëndë biznesin duke çuar në falimentimin e rreth 800 subjekteve.
“ARRSH në mënyrë të jashtëligjshme, pa asnjë lloj njoftimi dhe pa i dhënë rrugëzgjidhje të tjera bizneseve, po tentojnë të mbyllin daljet e bizneseve dhe aksesimin e tyre me rrugë dhe i bie që bizneset të mos kenë akses dhe të mbyllin aktivitetin e tyre, sepse siç e dini të gjithë nuk ekziston një rrugë dytësore siç është nga Tirana në Vorë, nga Vora në Durrës s’ka rrugë dytësore. Përmes këtij aksioni ARRSH kërkon mbylljen e këtyre bizneseve, bëhet fjalë për më shumë se 800 biznese të cilat kanë akses dhe lëvizin përmes kësaj rruge, të cilat me vazhdimin e këtij aksioni mbyllin aktivitetin e tyre. Ne kërkojmë të ndërpritet ky aksion sepse bëhet fjalë për biznese që kanë mbi 20 vite që e ushtrojnë aktivitetin e tyre përgjatë këtij segmenti me të gjitha rregullat. Nëse nuk merret parasysh bizneset do të përshkallëzojnë protestën e tyre në rrugë të tjera”, tha Isteri
Dy banorë të zonës thanë se janë bllokuar tërësisht pasi nuk kanë mundësi për të dërguar as fëmijët në shkollë, apo të kryejnë nevoja të tjera.
“Jemi familjarë, banojmë te mbikalimi i Fllakës, jemi 26 familje me një parcelë që jemi të bllokuar në të gjitha anët me kanale të mëdha. E vetmja dalje e hyrje që kemi është në autostradë. Kërkojmë rrugë dalje. Jemi të bllokuar, do çojmë fëmijët në shkollë në Durrës, edhe një kurs pasdite, ne s’kemi ku dalim, as ku të bëjmë tregti as ku të marrin ushqim. Nëse s’na marrin parasysh kërkesën do dalim me gra dhe fëmijë në autostradë”, tha një banor.
Ditën e djeshme, pronarët e bizneseve parashtruan dy kërkesa për zgjidhjen e situatës, së pari krijimin e një rruge dytësore nga Vora në urën e Dajlanit dhe përcaktimi i parametrave sipas standardeve rrugore.
Discussion about this post