Këngëtarja shqiptare me famë botërore, Dua Lipa, ka qenë natën e kaluar në premierën e filmit “Zgjoi” në Washington D.C. Artistja 26-vjeçare ka mbetur e mahnitur nga ky film, i cili shtjellon historinë e trishtë të grave të Krushës.
Me anë të disa fotove që Dua ka shpërndarë në rrjetin e saj social Instagram, ajo shikohet nën shoqërinë e regjisores së filmit, Blerta Basholli, aktores Yllka Gashi si dhe Presidentes së Kosovës, Vjosa Osmani.
Gjithashtu, këngëtarja shqiptare shkruan se filmi “Zgjoi” duhet të shikohet me patjetër dhe pret me shpresë që ky film të marrë një “Oscar”.
“Mbrëmë në shfaqjen e ‘HIVE (Zgjoi)’ – Një film i bukur i cili tregon historinë prekëse dhe frymëzuese të Fahrije Hotit dhe grave të Krushës. Kjo histori lufte dhe këmbënguljeje është ajo që duhet treguar. Ajo flet për shpirtin e përvojës kosovare dhe shpresoj se mund të ndihmojë në shërimin kolektiv të familjeve që u ndanë dhe njerëzve që humbën të dashurit e tyre. Jam shumë krenare për atë që ka arritur Blerta Basholli – është një frymëzim i vërtetë. ‘HIVE’ përfshiu bordin e Sundance dhe mezi pres me shpresë që ta shoh atë të marrë një ‘Oscars’! Duhet të shikohet”, ka shkruar interpretuesja e hitit “New Rules”.
Dua e shoqëruar nga Vjosa Osmani pritet që të marrë pjesë në mbrëmjen e ndarjes së çmimeve të Lidershipit të Shquar 2021 në Këshillin Atlatanik, ku do të nderohet me çmimin “Artistja e shquar e vitit 2021”.
Discussion about this post